جمعية صداقة الشعب و الشرطة .. مش عارف ليه افتكرت عماد الكبير اللى بيبين قد ايه الشرطة في خدمة الشعب و بتكيفه على الاخر لكن لما ركزت في المعنى الجميل .. صداقة الشعب الشرطة .. افتكرت الشهيد الشهم محمد المتناوي الله يرحمه

و افتكرت ظابط مطافئ مش عارف اسمه كان هيموت و هو بينقذ طفلة محبوسة في العمارة اللى قدامنا بسبب حريقة حصلت فيها .. صورته و كنت نفسي اعرف اسمه عشان ابعتله بوكيه ورد و كلمة شكر

لسة في امل ان ظباط مصر يفضلوا في خدمة شعب مصر و يمكن في يوم من الايام نحتفل بعيد الشرطة كأنه شم النسيم و نروح الاقسام و احنا شايلين ورد للظباط اللى بيدافعوا عننا و العساكر اللى سهرانيين عشانا .. حلم جميل بس اول مرة احس ان حلمي .. مستحيل


بلاعة مفتوحة من كتر الحوادث اللى حصلت بسببها سدوها ببردورة .. يمكن في ازمة غطيان بلاعات

نخلة في وسط الشارع !! يمكن اللى سفلتوا الشارع مأخدوش بالهم منها و اعتبروها ديكور

 

اعلان عن مكافأة كبيرة للي يلاقي بغبغان تايه .. لا تعليق

معدومي التفكير كتبوا الاعلان على جدار احد دورات المياة العامة لتحقيق اكبر نسبة مشاهدة .. واضح ان الشعب كله مزنوق

على فكرة مش بيكهرب و لا بيموت و لا حاجة .. امان على الاخر و في غيره كتير اوي

عامود نور ميت !! وقع فجأة وسط الشارع و الحمد لله محصلش حاجة بس معرفناش نطلب مين عشان يجي يشيله ؟

الحي طنش و كسّل يبعت حد يشفط المجاري اللى قالبة ريحة المنطقة قدام الجامعة , بكرة المطر ينزل و يخفف الريحة

 

ايوة هي .. حاملة طائرات امريكية محملة 100 طن بنبوني لاخواتنا العراقيين الله يرحمهم و ايوة هو .. كوبري مبارك السلام اللى جايلنا هدية من اليابان

اعلان مكتوب للطلبة المكفوفين .. المشكلة انه مكتوب بخط وحش

ده قصر السلامليك .. فندق فخم داخل قصر المنتزه اللى يعتبر احد الاثار المهمة في تاريخنا .. علم امريكا موجود ليه ؟